Viongozi watakiwa kuzingatia misingi ya utawala bora

Viongozi wa serikali za vijiji na kata wilayani Uyui wameshauriwa kuzingatia misingi ya utawala bora kwa kuwahudumia watu wenye ulemavu kama watu wengine.

Ushauri huo umetolewa  na mbunge wa Tabora kaskazini mheshimiwa Shafin Sumar wakati akizungumza na VOT FM STEREO kwa njia ya simu kutoka bungeni mjini Dodoma.

Amesema viongozi hao wakizingatia misingi ya utawala bora katika kutekeleza majukumu yao wataondoa changamoto zinazowakabili watu wenye ulemavu ikiwa ni pamoja na kuwashirikisha katika vikao vya maamuzi.

Mheshimiwa Sumar amebanisha kuwa endapo watu wenye ulemavu watashirikishwa kikamilifu katika vikao hivyo watapata fursa ya kuzisemea changamoto walizonazo na kuzipatia ufumbuzi changamoto hizo.

Aidha amewataka watu wenye ulemavu wilayani humo kujiamini na kujitokeza kugombea nafasi mbalimbali za uongozi katika uchaguzi ujao wa serikali za mitaa ikiwa ni sehemu ya mkakati wa kuingia kwenye vikao vya maamuzi.